Bugun.tv xəbər verir ki, Böyük Britaniya və Avropa İttifaqı Brexitdən sonrakı münasibətlərin inkişaf etdirilməsi məqsədilə yeni əməkdaşlıq imkanlarını müzakirə etməyə hazırlaşır.
Məlumata görə, iyulun 22-də Brüsseldə keçiriləcək sammitdə gənclər üçün təhsil və məşğulluq proqramlarının genişləndirilməsi, ticarət maneələrinin azaldılması və iqtisadi əməkdaşlığın gücləndirilməsi məsələləri gündəmdə olacaq.
Tərəflərin xüsusilə tələbə mübadilə proqramları, peşə hazırlığı imkanları və gənclərin əmək bazarına çıxışının asanlaşdırılması istiqamətində ortaq mexanizmlər üzərində işlədiyi bildirilir. Sammit çərçivəsində həmçinin kiçik və orta biznesin fəaliyyətinə təsir edən gömrük prosedurlarının sadələşdirilməsi də müzakirə ediləcək.
Ekspertlər hesab edirlər ki, tərəflər arasında münasibətlərin normallaşması təkcə iqtisadi əlaqələrə deyil, həm də elm, təhsil və mədəniyyət sahələrində əməkdaşlığın genişlənməsinə töhfə verə bilər.
Bununla yanaşı, bəzi siyasi müşahidəçilər danışıqların mürəkkəb keçəcəyini və tərəflər arasında müəyyən fikir ayrılıqlarının qalmaqda davam etdiyini vurğulayırlar.
Mənbə: The Guardian