Bugun.tv xəbər verir ki, Şimali Atlantik okeanında yerləşən Farer adaları dünyada analoqu az olan mühəndislik layihəsini həyata keçirib. Atlantik okeanının altında inşa edilən dörd sualtı tunel sayəsində adalar arasında nəqliyyat əhəmiyyətli dərəcədə sürətlənib və bərə asılılığı azalıb.
Şotlandiya ilə İslandiya arasında yerləşən, dağlıq relyefi ilə seçilən Farer adaları dənizlə bir-birindən ayrılan yaşayış məntəqələrini birləşdirmək məqsədilə genişmiqyaslı infrastruktur layihəsi reallaşdırıb. Rəsmi statistika qurumu Hagstova Føroyanın məlumatına görə, 1 iyun 2026-cı il tarixinə adalarda 55 min 409 nəfər yaşayır.
Adalarda nəqliyyat sistemi hazırda dörd əsas sualtı tunel üzərində qurulub. P/F Tunnil şirkəti tərəfindən idarə olunan tunellər ilin bütün günləri sutkanın 24 saatı fasiləsiz fəaliyyət göstərir. Tunellərdən biri 4,9 kilometr uzunluğundadır və hava limanının yerləşdiyi Vágar adasını paytaxt Torshavnla birləşdirir. Digər tunel isə 6,2 kilometr uzunluğa malikdir və ən dərin nöqtəsində dəniz səviyyəsindən 160 metr aşağıya enir.
Layihənin ən diqqətçəkən hissəsi isə dəniz səviyyəsindən 72 metr aşağıda yerləşən və dünyanın ilk sualtı dairəvi yol qovşağı hesab edilən mühəndislik qurğusudur. Ümumi uzunluğu 11,24 kilometr olan bu tunel sistemi sayəsində iki məntəqə arasında əvvəllər 64 dəqiqə çəkən yol artıq cəmi 16 dəqiqəyə qət olunur.
Farer adalarının ən uzun tuneli isə 10,8 kilometr uzunluğa malikdir və adalardan birini fasiləsiz quru yolu ilə digər hissələrlə birləşdirir.
Məlumata görə, dörd tunelin tikintisinə ümumilikdə təxminən 346 milyon avro vəsait xərclənib. Layihə Skandinaviya tikinti şirkəti NCC tərəfindən qazma və partlatma üsulu ilə inşa olunub. Maliyyələşmə dövlət vəsaiti və kreditlər hesabına həyata keçirilib.
Tunellərin istismar xərclərinin və kredit ödənişlərinin qarşılanması məqsədilə sürücülərdən keçid haqqı alınır.
Mənbə: EnSonHaber