Bugun.tv xəbər verir ki, Fransada iyun ayının sonunda müşahidə olunan rekord istilər ölkənin dəfn xidmətləri və meyitxanalarında ciddi çətinliklər yaradıb. Ölüm hallarının kəskin artması səbəbindən bəzi dəfn müəssisələri əlavə soyuducu konteynerlərdən istifadə etməyə məcbur qalıb.
Reuters-in məlumatına görə, istilər zamanı bəzi bölgələrdə ölüm halları adi dövrlə müqayisədə üç dəfəyədək artıb. Paris və digər şəhərlərdə meyitxanalarda yer çatışmazlığı yarandığından cənazələrin müvəqqəti saxlanılması üçün əlavə soyuducu avadanlıqlar quraşdırılıb.
Fransa Səhiyyə Agentliyinin ilkin hesablamalarına əsasən, rekord istilər nəticəsində ölkədə azı 2 025 əlavə ölüm qeydə alınıb. Ölənlərin böyük əksəriyyətini 65 yaşdan yuxarı şəxslər təşkil edib. Mütəxəssislər bildirirlər ki, yekun statistika açıqlanandan sonra bu rəqəmin daha da arta biləcəyi istisna olunmur.
Ekspertlər hesab edirlər ki, Fransada əhalinin yaşlanması, iqlim dəyişikliyi və həddindən artıq isti hava dalğalarının tezləşməsi səhiyyə və dəfn xidmətləri üzərində təzyiqi artırır. Onların fikrincə, gələcəkdə belə hadisələrin qarşısını almaq üçün ölkənin infrastrukturunun daha isti iqlim şəraitinə uyğunlaşdırılması vacibdir.
Mənbə: Reuters