ABŞ Prezidenti Donald Tramp Yəməndə fəaliyyət göstərən husilərin Qırmızı dənizdə iki Səudiyyə Ərəbistanı neft tankerinə hücumundan sonra İrana qarşı sərt xəbərdarlıq edib. O bildirib ki, husilərin gələcək hücumlarına görə Tehran məsuliyyət daşıyacaq və buna cavab olaraq İran və husilərə qarşı ciddi hərbi tədbirlər görüləcək.
Reuters-in məlumatına görə, husilər hücumun Səudiyyə Ərəbistanına qarşı elan etdikləri dəniz blokadasının tərkib hissəsi olduğunu açıqlayıblar. Hadisə Qırmızı dənizdəki Bab əl-Məndəb boğazında gəmiçiliyin təhlükəsizliyi ilə bağlı narahatlıqları artırıb və Yaxın Şərqdə gərginliyin daha da genişlənəcəyi ehtimalını gücləndirib.
Artan risklər fonunda dünya neft bazarında qiymətlər kəskin yüksəlib. Brent markalı neftin qiyməti may ayından bəri ilk dəfə 100 ABŞ dollarını ötərək təxminən 100,7 dollara çatıb. Analitiklər xəbərdarlıq edirlər ki, bölgədəki gərginlik davam edərsə, enerji bazarında yeni bahalaşma dalğası yarana bilər.
Mənbə: Reuters