Bugun.TV xəbər verir ki, Macarıstanda keçirilən parlament seçkisində Pyotr Magyarın rəhbərlik etdiyi mərkəz-sağçı TİZA Partiyası böyük qələbə qazanaraq parlamentdə üçdə iki çoxluq əldə edib. Bununla da Viktor Orbanın 16 illik hakimiyyəti başa çatıb.
Reuters-in məlumatına görə, Magyar seçkidən sonra verdiyi açıqlamada Macarıstanın hüququn aliliyi və demokratik standartlar baxımından yenidən qurulacağını bildirib. O, korrupsiyaya qarşı mübarizənin gücləndiriləcəyini, məhkəmə hakimiyyətinin müstəqilliyinin bərpa olunacağını və mətbuat azadlığının təmin ediləcəyini açıqlayıb.
Magyar həmçinin konstitusiyaya dəyişiklik etməyi və baş nazirlik müddətini iki dönəmlə məhdudlaşdırmağı planlaşdırdığını bildirib. Onun sözlərinə görə, yeni hökumət Avropa İttifaqı ilə münasibətləri yaxşılaşdıracaq və Macarıstanın dondurulmuş Aİ vəsaitlərinə çıxışını bərpa etməyə çalışacaq.
Yeni hökumətin Avropa İctimai Prokurorluğuna qoşulmaq və ölkənin Aİ və NATO daxilində daha güclü tərəfdaş mövqeyinə qayıtmaq niyyətində olduğu da açıqlanıb. Reuters qeyd edir ki, seçkinin nəticəsindən sonra Macarıstan forinti avro qarşısında son dörd ildən çox müddətin ən yüksək səviyyəsinə yüksəlib, Budapeşt birjasında isə artım qeydə alınıb.
Mənbə: Reuters