Bugun.tv xəbər verir ki, Rusiya rəsmilərinin məlumatına görə, Ukraynanın 2026-cı ildə Rusiyaya qarşı həyata keçirdiyi ən genişmiqyaslı PUA hücumlarından biri nəticəsində ölkə üzrə azı 7 nəfər həlak olub.
Hücum zamanı təxminən 822 PUA-dan istifadə edildiyi bildirilib. Moskva vilayətinin qubernatoru paytaxta doğru təxminən 600 PUA-nın göndərildiyini və Moskvanın son dövrlərin ən kütləvi PUA hücumlarından biri ilə üzləşdiyini açıqlayıb.
Hücumlar zamanı Rusiyanın onlayn pərakəndə satış şirkəti Wildberries-ə məxsus böyük logistika anbarının da vurulduğu bildirilib.
Moskva və cənub bölgələrində ölənlər var
Rusiyanın cənub-qərbində yerləşən Rostov vilayətində gecə boyu davam edən hücumlarda 5 nəfərin öldüyü açıqlanıb. Ukrayna sərhədində yerləşən Belqorod vilayətində mülki avtobusa zərbə endirilməsi nəticəsində bir qadın həyatını itirib. Moskva vilayətində isə 83 yaşlı kişinin öldüyü bildirilib.
Moskva şəhərindən təxminən 25 kilometr məsafədə yerləşən Koledinoda Wildberries şirkətinin logistika anbarının vurulması nəticəsində 3 nəfərin yaralandığı qeyd olunub. Hadisə ilə bağlı yayılan görüntülərdə anbardan güclü tüstünün qalxdığı və yanğın baş verdiyi görünür.
Rusiya tərəfinin məlumatına görə, Wildberries iyul ayından etibarən dəfələrlə hücumların hədəfinə çevrilib. Kiyev administrasiyası şirkətin Rusiya ordusu üçün hərbi təchizatın təmin edildiyi logistika mərkəzlərinə malik olduğunu bildirir və hücumların ordunun təchizat zəncirini pozmağa yönəldiyini iddia edir.
Ukraynada da itkilər və dağıntılar qeydə alınıb
Eyni vaxtda Rusiyanın Ukraynaya endirdiyi zərbələr nəticəsində də azı 7 nəfərin öldüyü, 39-dan çox insanın yaralandığı bildirilir.
Zaporojye vilayətində fərdi yaşayış evinin idarəolunan bomba ilə vurulması nəticəsində 2 nəfərin öldüyü açıqlanıb. Dnepropetrovsk vilayətinin Krivoy Roq şəhərində də 2 nəfərin həyatını itirdiyi bildirilib. Sumı, Donetsk və Xerson vilayətlərinin hər birində isə bir nəfərin öldüyü qeyd olunub.
Ukraynanın paytaxtı Kiyevdə hava hücumu sirenləri gecə ərzində 4 dəfə işə düşüb. Kiyev meri Vitali Kliçko ən azı 6 nəfərin yaralandığını açıqlayıb.
Rusiya tərəfi Kiyevdəki zərbələr zamanı “Flamingo” raketləri üçün komponentlər istehsal edən müəssisənin və PUA hissələri hazırlayan fabrikin hədəfə alındığını bildirib. Kiyevin Poçayna rayonundakı kitab bazarının da hücum nəticəsində zərər gördüyü qeyd olunub.
Ukrayna Prezidenti Volodimir Zelenski isə Rusiyanın həftə ərzində ölkənin 13 bölgəsinə hücum etdiyini bildirib. Onun sözlərinə görə, Rusiya bu müddətdə 1 550-dən çox hücum PUA-sı, təxminən 1 560 idarəolunan aviasiya bombası və 62 raket buraxıb.
Məlumata görə, Ukrayna Rusiya ballistik raketlərinin qarşısını almaq üçün uzun müddətdir ABŞ istehsalı Patriot sistemlərindən istifadə edir. Bununla yanaşı, ABŞ-ın İranla münaqişə fonunda öz raket ehtiyatlarının əhəmiyyətli hissəsindən istifadə etməsi səbəbindən Ukraynaya yeni tədarüklərlə bağlı çətinliklərin yarandığı bildirilir.
Ukraynanın keçmiş müdafiə naziri Mixaylo Fedorov isə ölkəsinin 3–6 ay ərzində yerli istehsal ballistik raketlərlə Rusiya ərazisini vurmaq imkanına çata biləcəyini açıqlayıb.
Mənbə: Trt.haber