Bugun.tv xəbər verir ki, İngiltərə Baş naziri Endi Börnham ABŞ Prezidenti Donald Trampın aparat rəhbəri Syuzi Uaylsı təqlid edən şəxslə mesajlaşıb.
Politico-nun dörd rəsmi şəxsə istinadən yaydığı məlumata görə, Börnham Trampın aparat rəhbəri Uaylsın adından istifadə edən şəxslə müəyyən müddət ərzində yazışıb.
İngiltərə Baş nazirinin daha sonra qarşı tərəfin həqiqi şəxs olmadığından şübhələndiyi bildirilir. Börnhamla Uaylsı təqlid edən şəxs arasında nələrin müzakirə edildiyi və mesajların konkret olaraq nə vaxt göndərildiyi açıqlanmayıb.
İngiltərə Baş nazirlik ofisi – 10 Downing Street – Politico-nun məlumatı ilə bağlı açıqlamasında milli təhlükəsizlik məsələlərinə dair şərh vermədiyini bildirib.
Məlumata görə, Börnham Baş nazir vəzifəsinə başladıqdan sonra sözügedən şəxslə bir neçə mesaj mübadiləsi aparıb. Mənbələr yazışmaların hər hansı mühüm məsələ ilə bağlı olmadığını və mesajların şübhəli hesab edildikdən dərhal sonra müvafiq qurumlara bildirildiyini qeyd ediblər.
İngiltərənin Vaşinqtondakı səfirliyi də hadisə ilə bağlı narahatlığını ABŞ administrasiyasına çatdırıb. Ağ Ev isə məsələ ilə bağlı açıqlama verməkdən imtina edib.
Bu hadisə ABŞ-da daha əvvəl baş vermiş oxşar halları da gündəmə gətirib. Ötən il ABŞ senatorları, qubernatorları və iş adamlarından bir neçəsi Trampın aparat rəhbəri olduğunu iddia edən şəxsdən mesajlar və telefon zəngləri almışdı. Bundan sonra Ağ Ev və Federal Təhqiqatlar Bürosu (FBI) araşdırmaya başlamışdı.
Mənbə: Trt.haber