Bugun.tv xəbər verir ki, Yaponiyanın Aomori prefekturasında təxminən 360 ton ağırlığında Hirosaki qalasının əsas qülləsi 1 800 nəfərin iştirakı ilə 2 metrdən çox məsafəyə hərəkət etdirilib. Qeyri-adi əməliyyat qalanın uzunmüddətli bərpa işləri çərçivəsində həyata keçirilib.
Qalanın qülləsi zəlzələ nəticəsində zədələnmiş daş divarın təmirinə imkan yaratmaq üçün əvvəlki yerindən uzaqlaşdırılmışdı. İndi isə bərpa işlərinin növbəti mərhələsində tarixi tikili ilkin mövqeyinə qaytarılır.
Əməliyyat zamanı iştirakçılar 80 nəfərlik qruplara bölünüb və növbə ilə təxminən 30 metr uzunluğunda kəndirləri çəkiblər. Qüllə şənbə günü 1,13 metr, bazar günü isə daha 1,09 metr hərəkət etdirilib. Beləliklə, iki gün ərzində ümumilikdə 2,22 metr məsafə qət edilib.
Mütəxəssislər bunun üçün Yaponiyada əsrlərdir istifadə olunan “hikiya” üsulundan yararlanıblar. Bu texnikada tarixi bina sökülmür, bütöv şəkildə xüsusi relslər və diyircəklər üzərində hərəkət etdirilir.
Tədbirə maraq gözləniləndən xeyli yüksək olub. Məlumata görə, 1 800 iştirakçı yeri üçün təxminən 8 000 müraciət daxil olub. Hirosaki qalasının bərpasının daha uzun müddət davam edəcəyi və əsas qüllənin yaxın illərdə geniş mühafizə və möhkəmləndirmə işlərindən keçəcəyi bildirilir.
Qalanın 1611-ci ildə inşa edildiyi və Yaponiyada qorunub saxlanılan azsaylı orijinal feodal dövrü qala qüllələrindən biri olduğu qeyd olunur.
Mənbə: The Guardian