Bugun.tv xəbər verir ki, Rusiyanın Tambov vilayətində elektron ticarət şirkəti Wildberries-ə məxsus logistika mərkəzinə pilotsuz uçuş aparatları ilə hücumdan sonra böyük yanğın baş verib.
Reuters-in məlumatına görə, hadisə gecə saatlarında Tambov vilayətinin Kotovsk şəhərində baş verib. Hücum nəticəsində logistika mərkəzində başlayan yanğın təxminən 100 min kvadratmetr, yəni 14 futbol meydançasına bərabər ərazini əhatə edib.
Tambov vilayətinin qubernatoru Yevgeni Pervışov bildirib ki, ilkin məlumata əsasən, hücum zamanı bir nəfər xəsarət alıb. Yanğının söndürülüb-söndürülmədiyi barədə isə məlumat verilməyib.
Reuters qeyd edir ki, son vaxtlar Rusiyanın onlayn ticarət şirkətlərinin logistika mərkəzləri pilotsuz aparat hücumlarının hədəfinə çevrilir. Wildberries-in əsas rəqibi olan Ozon-un obyektlərinə qarşı da son günlər bir sıra hücumlar həyata keçirilib.
Wildberries və Ozon Rusiyanın sürətlə böyüyən elektron ticarət sektorunun əsas şirkətləri arasında yer alır. Onların logistika infrastrukturuna hücumlar ölkənin iqtisadiyyatına əlavə təzyiq yaradır.
Rusiya və Ukrayna müharibə başlayandan bəri mülki şəxsləri hədəf aldıqları barədə qarşılıqlı ittihamları rədd edir.
Mənbə: Reuters