Bugun.tv xəbər verir ki, Hindistanın Qida Təhlükəsizliyi və Standartları İdarəsi qablaşdırılmış qida və içkilərin üzərinə ön tərəfdən xəbərdarlıq nişanlarının yerləşdirilməsini təklif edib.
Reuters-in məlumatına görə, yeni qaydalara əsasən, tərkibində yüksək miqdarda doymuş yağ, şəkər və ya duz olan məhsulların üzərində qırmızı rəngli altıbucaqlı xəbərdarlıq nişanı olacaq. Nişanda məhsulun yüksək yağ, yüksək şəkər və ya yüksək duz tərkibli olduğu göstəriləcək.
Təklif Hindistanda sağlam qidalanma ilə bağlı narahatlıqların artdığı bir vaxtda irəli sürülüb. Ölkənin Ali Məhkəməsi də hökuməti qida məhsullarının üzərində daha aydın xəbərdarlıqlar tətbiq etməyə çağırıb.
Hazırda Hindistanda istehsalçılar əsasən məhsulların tərkibini və qida dəyərlərini qablaşdırmanın arxa hissəsində göstərirlər. Yeni sistemin istehlakçılara, xüsusilə uşaqlara və digər həssas qruplara daha məlumatlı seçim etməkdə kömək edəcəyi bildirilir.
Qaydaların mərhələli şəkildə tətbiqi nəzərdə tutulur. Tək tərkibli qida məhsullarının isə yeni tələbdən azad ediləcəyi bildirilir.
Mənbə: Reuters