Bugun.tv xəbər verir ki, ABŞ Maliyyə Nazirliyi İranla əlaqəli fəaliyyətə görə Türkiyənin Golden Global Yatırım Bankası və onun iki törəmə şirkətinə yeni sanksiyalar tətbiq edib.
ABŞ Maliyyə Nazirliyinin Xarici Aktivlərə Nəzarət İdarəsi (OFAC) Golden Global Portföy Yönetimi və Golden Global Varlık Kiralama şirkətlərini də sanksiya siyahısına daxil edib. Bu qərar həmin qurumların ABŞ dolları maliyyə sisteminə çıxışını ciddi şəkildə məhdudlaşdırır.
Vaşinqton bankı İranın maliyyə şəbəkəsinə yardım göstərməkdə ittiham edir. ABŞ tərəfinin iddiasına görə, Golden Global İranın neft gəlirlərinin Çindən Türkiyəyə köçürülməsində və İran İnqilab Keşikçiləri Korpusunun “Qüds” qüvvələri ilə əlaqəli əməliyyatların həyata keçirilməsində rol oynayıb.
ABŞ Maliyyə naziri Skott Bessent bildirib ki, yeni sanksiyalar İran üzərində iqtisadi təzyiqi artırmaq və Tehranı danışıqlar masasına qaytarmaq məqsədi daşıyır.
Reuters-in məlumatına görə, bu addım ABŞ-ın İranla əlaqəli maliyyə qurumlarına qarşı daha geniş sanksiya kampaniyasının bir hissəsidir.
Mənbə: Reuters