Bugun.tv xəbər verir ki, Google Cloud infrastrukturunda baş verən nasazlıq Böyük Britaniyada bir sıra bankların, mağazaların və çatdırılma xidmətlərinin fəaliyyətində problemlərə səbəb olub. Oktyabrın 20-də qeydə alınan genişmiqyaslı fasilənin Qərbi Avropadakı texniki infrastrukturla bağlı olduğu bildirilib.
“Anadolu” agentliyinin məlumatına görə, Google insidentin elektrik enerjisi ilə bağlı hadisədən qaynaqlandığını açıqlayıb. Şirkət nasazlığın təsirinin məhdudlaşdırıldığını, xidmətlərin bərpası üzərində işlərin davam etdiyini bildirib. Google mövcud sistemlərin fəaliyyətinin bərpasına üstünlük verildiyini və tam bərpanın gün ərzində başa çatdırılmasının nəzərdə tutulduğunu qeyd edib.
Bank və çatdırılma xidmətlərində problemlər
Nasazlıqdan təsirlənən xidmətlər arasında “Revolut”, “Lloyds Bank” və “HSBC” banklarının tətbiqləri, eləcə də “Screwfix” mağazalar şəbəkəsi və “DPD” çatdırılma şirkəti göstərilib. Xidmətlərdə yaranan problemlər istifadəçilərin əməliyyatlar aparmasına və bəzi onlayn platformalardan yararlanmasına mane olub.
Məlumatlara əsasən, rəqəmsal bank platforması “Revolut”un milyonlarla müştərisi hesablarına daxil olmaqda və kart ödənişləri həyata keçirməkdə çətinliklərlə üzləşib. Şirkətin dünyada 80 milyondan çox, Böyük Britaniyada isə təxminən 13 milyon müştərisi olduğu bildirilir.
Dövlət xidmətlərinə də təsir ehtimalı
Böyük Britaniyada bəzi dövlət qurumlarının və məhkəmə xidmətlərinin internet resurslarında da problemlər qeydə alınıb. Bunların arasında İngiltərənin Milli Səhiyyə Xidməti (NHS England), Məhkəmələr və Tribunal Xidməti, eləcə də hökumətin rəsmi saytı göstərilib.
Bununla belə, həmin qurumların fəaliyyətindəki fasilələrin birbaşa Google Cloud nasazlığı ilə əlaqəli olub-olmadığı dəqiqləşdirilməyib.
İngiltərə və Uelsdə fəaliyyət göstərən Cinayət Hüquqşünasları Assosiasiyası da məhkəmə iclaslarında istifadə olunan videokonfrans platformasının işləmədiyini açıqlayıb. Qurumun bildirdiyinə görə, bu vəziyyət bəzi məhkəmə proseslərinin keçirilməsinə mane olub və işlərin yığılmasının aradan qaldırılmasını çətinləşdirib.
Məlumata görə, oxşar internet fasiləsi 2025-ci il oktyabrın 20-də də baş vermiş, “Lloyds Bank” və “Snapchat” daxil olmaqla, mindən çox sayt və tətbiqin fəaliyyətinə təsir göstərmişdi.
Mənbə: Anadolu agentliyi