Bugun.tv xəbər verir ki, Rusiyanın gecə saatlarında Ukraynanın paytaxtı Kiyevə endirdiyi hava zərbələri nəticəsində 2 nəfər həyatını itirib, 10 şəhər sakini yaralanıb.
Kiyev şəhərinin meri Vitali Kliçko bildirib ki, yaralananlardan 5-i xəstəxanaya yerləşdirilib. Onun sözlərinə görə, iki yaralının vəziyyəti ağırdır.
Hücum nəticəsində paytaxtın müxtəlif ərazilərində anbarlarda, kommersiya obyektlərində, xüsusi məktəbin yerləşdiyi ərazidə və yaşayış binalarında yanğınlar baş verib. Bir sıra binalara və avtomobillərə də ziyan dəyib.
Hadisə yerlərində xilasedicilər və şəhər xidmətlərinin əməkdaşları fəaliyyətlərini davam etdirirlər. Kliçko bildirib ki, Kiyevdə hava hücumu xəbərdarlığı hələ də qüvvədədir.
Şəhər rəhbərliyi sakinlərə təhlükəsiz yerlərdə qalmaq və hava hücumu siqnalı başa çatana qədər sığınacaqlardan çıxmamaq çağırışı edib.
Son hücum Kiyevdə müharibənin şəhər əhalisi üçün yaratdığı təhlükənin davam etdiyini bir daha göstərib. Dağıntıların miqyası və hücumun detalları ilə bağlı araşdırma aparılır.
Mənbə: TRT Haber