Bugun.tv xəbər verir ki, siyasi ekspert Məhəmməd Əsədullazadə Yəməndə davam edən qarşıdurma, Husilərin mövqeləri və bunun regiondakı güc balansına mümkün təsirləri barədə fikirlərini bölüşüb.

Ekspertin sosial media hesabındakı sözlərinə görə, Yəməndə Səudiyyə Ərəbistanının dəstəklədiyi qüvvələrlə İranın dəstək verdiyi Husilər arasında qarşıdurma davam edir. Əsədullazadə hesab edir ki, Husilərin strateji əhəmiyyət daşıyan Babül-Məndəb boğazına nəzarəti gücləndirməsi İranın regiondakı mövqelərinə əlavə üstünlük verə bilər.

Məhəmməd Əsədullazadə bildirir ki, Türkiyə, Səudiyyə Ərəbistanı və Pakistan arasında imzalanmış Məkkə sazişi fonunda Ankara və İslamabadın Yəmən münaqişəsinə birbaşa müdaxiləsi məsələsi ayrıca qiymətləndirilməlidir. Onun fikrincə, hazırkı vəziyyətdə Səudiyyə Ərəbistanına qarşı birbaşa quru hücumu baş vermədiyi halda Türkiyə və Pakistanın hərbi müdaxiləsi ehtimalı məhdud olaraq qalır.

Ekspert hesab edir ki, Yəməndəki qarşıdurma daha geniş ABŞ-İran qarşıdurmasının tərkib hissəsi kimi də nəzərdən keçirilə bilər. Onun fikrincə, hər iki tərəf bölgədə müxtəlif qüvvələr üzərindən mübarizə aparır və Yəmən bu qarşıdurmanın əsas istiqamətlərindən birinə çevrilib.

Əsədullazadə həmçinin bildirib ki, noyabr ayına qədər Husilərin məğlub edilməməsi ABŞ Prezidenti Donald Tramp üçün ciddi siyasi sınaq yarada bilər. Onun fikrincə, Yəməndə vəziyyətin necə inkişaf edəcəyi Vaşinqtonun regiondakı siyasətinə və ABŞ-İran qarşıdurmasının gələcək istiqamətinə təsir göstərə bilər.