Bugun.tv xəbər verir ki, Kremlin sözçüsü Dmitri Peskov Litvada nüvə silahlarının yerləşdirilməsi ehtimalına münasibət bildirib. O, belə bir addımın Rusiyanın təhlükəsizliyi baxımından ciddi nəticələr doğuracağını və Litva ərazisinin Rusiya nüvə silahlarının hədəfinə çevriləcəyini deyib.
Peskov Rusiyanın “Pervıy Kanal”ına müsahibəsində Litvanın konstitusiyasındakı nüvə silahlarına qoyulan qadağanı aradan qaldırmaqla bağlı planlarını şərh edib. Onun sözlərinə görə, əgər bir ölkənin ərazisində nüvə silahı yerləşdirilirsə, bunun konkret məqsədi olmalıdır.
Kremlin sözçüsü hesab edir ki, Litvada yerləşdirilə biləcək nüvə silahları Rusiyaya qarşı yönələ bilər. Peskov bildirib ki, belə bir vəziyyət yaranarsa, həmin ölkənin ərazisi Rusiyanın nüvə silahları üçün hədəf olacaq.
“Bu, vəziyyəti ciddi şəkildə gərginləşdirəcək”, – deyə Peskov vurğulayıb.
Kremlin sözçüsünün açıqlaması Litvanın nüvə silahları ilə bağlı mümkün siyasət dəyişikliyi fonunda Rusiya ilə NATO arasında təhlükəsizlik məsələləri üzrə gərginliyin daha da artması ehtimalını gündəmə gətirib.
Mənbə: Trt.haber