Bugun.tv xəbər verir ki, yaşlanma əleyhinə məhsullar arasında populyarlığı artan kollagen əlavələrinin dəriyə faydaları ilə bağlı elmi araşdırmalar ciddi tənqid olunub.
Trinity College Dublin-dən bio-statistik David Robert Grimes və britaniyalı dermatoloq Anjali Mahto tərəfindən aparılan yeni qiymətləndirmədə kollagen əlavələri ilə bağlı əvvəlki meta-analizlər araşdırılıb. Tədqiqatçılar bəzi statistik hesablamalarda səhvlər və məlumatların düzgün təqdim edilməməsi hallarını müəyyən ediblər.
Məlumata görə, məlumatlar yenidən təhlil edildikdə kollagenin qəbul edilən dozası ilə dərinin nəmliliyi və elastikliyinin artması arasında əhəmiyyətli əlaqə aşkarlanmayıb. Tədqiqatların böyük hissəsinin sənaye tərəfindən maliyyələşdirilməsi və bəzi müəlliflərin kollagen istehsalçıları ilə kommersiya əlaqələrinin olması da nəticələrin etibarlılığı ilə bağlı suallar yaradıb.
Mütəxəssislər ehtiyatlı olmağa çağırır
Araşdırmalarda iştirakçı sayının az olması, istifadə edilən kollagen dozalarının və müalicə müddətlərinin fərqlənməsi də əsas problemlər sırasında göstərilib. Müəlliflər yüksək keyfiyyətli və müstəqil sübutlar əldə olunana qədər kollagen əlavələrinin dəri yaşlanmasına qarşı təsdiqlənmiş vasitə kimi tövsiyə edilməsinin elmi baxımdan əsaslı olmadığını bildirirlər.
Mənbə: TRT Haber