Avstraliyanın Tasmaniya sahillərində yerləşən Klark adasında uzun illərdir canlı şəkildə rast gəlinməyən exidnaların yenidən müşahidə olunması təbiəti mühafizə edənləri sevindirib. Yeni görüntülər bu heyvanların adada yaşamağa davam etdiyini və saylarının bərpa oluna biləcəyini göstərir.
Bugun.tv xəbər verir ki, adada vəhşi pişikləri tutmaq üçün qurulmuş qəfəsə bir exidna düşüb. Hadisə sentyabr ayında baş versə də, noyabrın 5-də yayılan məlumat geniş maraq doğurub.
Pakana xalqından olan təbiət mühafizəçisi Tasha Cooper qəfəsdəki heyvanı gördükdə təəccübləndiyini bildirib. Onun sözlərinə görə, bu, adada onilliklər ərzində canlı şəkildə rast gəlinən ilk exidna olub.
Müşahidə kameraları daha bir neçə heyvanı qeydə alıb
Sonrakı araşdırmalar zamanı müşahidə kameraları adanın dörd ayrı nöqtəsində exidnaları qeydə alıb. Tasmaniya Universitetinin mütəxəssisi Stüart Nikoll adanın ölçüsünü və müşahidələrin sayını nəzərə alaraq burada ən azı 12, hətta 20–30 exidnanın yaşaya biləcəyini ehtimal edib. Bu rəqəmlər hələ dəqiq sayımın nəticəsi deyil.
Xatırladaq ki, 2014-cü ildə baş verən güclü meşə yanğını adanın bitki örtüyünün 98 faizini məhv etmişdi. Hazırda yerli icmalar ərazinin bərpası, yad bitkilərin və vəhşi pişiklərin aradan qaldırılması, yerli heyvanların qorunması istiqamətində iş aparırlar.
Mənbə: ABC News