Rusiyanın Ukraynanın enerji infrastrukturuna endirdiyi zərbələr nəticəsində ölkənin yeddi bölgəsində elektrik təchizatında fasilələr yaranıb. Ən ağır vəziyyət paytaxt Kiyevin yerləşdiyi regionda qeydə alınıb.
Bugun.tv xəbər verir ki, Reuters agentliyinin noyabrın 6-da yaydığı məlumata görə, hücumlar gecə saatlarında və cümə günü səhər saatlarında elektrik şəbəkəsinə ciddi ziyan vurub.
Ukraynanın energetika nazirinin müavini Artem Nekrasov bildirib ki, elektrik təchizatında fasilələr Vinnitsa, Dnepropetrovsk, Jitomir, Zaporojye, Kiyev, Xarkov və Çerniqov vilayətlərini əhatə edib.
Paytaxt regionunda vəziyyət daha ağırdır
Nekrasovun sözlərinə görə, ən çətin vəziyyət Kiyev vilayətində qalmaqdadır. Enerji infrastrukturuna dəyən genişmiqyaslı ziyan səbəbindən elektrik enerjisinin ötürülməsində məhdudiyyətlər tətbiq olunur.
Enerji və kommunal xidmətlərin əməkdaşları zədələnmiş şəbəkələrin fəaliyyətinin bərpası istiqamətində işlərini davam etdirirlər. Lakin dağıntıların miqyası elektrik təchizatının tam bərpasını çətinləşdirir.
Ukraynanın enerji sisteminə qarşı hücumların davam etməsi qarşıdan gələn soyuq mövsümdə əhalinin elektrik və istilik təminatı ilə bağlı narahatlıqları artırır.
Mənbə: Reuters