Bugun.tv xəbər verir ki, İtaliya, Şotlandiya və Şimali İrlandiyada minlərlə məktəbə bomba təhlükəsi barədə elektron məktublar göndərilib. Təhdidlərdən sonra İtaliyada bir sıra təhsil müəssisələri ehtiyat tədbiri olaraq boşaldılıb.
TRT Haber-in BBC-yə istinadən yaydığı məlumata görə, İtaliyada təxminən 6 300, Şotlandiya və Şimali İrlandiyada isə ümumilikdə 700-dən çox məktəb belə mesajlar alıb. İtaliyada ölkə üzrə 7 476 dövlət məktəbindən təxminən 6 300-nün elektron poçtuna eyni məzmunlu məktub göndərildiyi bildirilir.
İtaliyanın Baş naziri Corcia Meloni aparılan yoxlamalarda konkret təhlükə əlamətlərinin aşkarlanmadığını açıqlayıb. O, bu təhdidlərin cəmiyyətdə qorxu və narahatlıq yaratmağa hesablandığını bildirib.
Şotlandiya polisi də mesajları ilkin qiymətləndirmə zamanı əsassız təhdid kimi dəyərləndirib. Şimali İrlandiyada isə polis əks göstəriş vermədiyi müddətdə məktəblərin fəaliyyətini davam etdirməsi tövsiyə olunub.
Təhdidlərin eyni mənbədən göndərilib-göndərilmədiyi hələlik tam müəyyənləşdirilməyib. Hüquq-mühafizə orqanları mesajların mənbəyini araşdırır.
Mənbə: TRT Haber