Bugun.tv xəbər verir ki, noyabrın 16-da Ukrayna qüvvələrinin Rusiya ilə Krım yarımadasını birləşdirən Kerç körpüsünə zərbə endirdiyi barədə məlumat yayılıb. Hadisədən sonra strateji əhəmiyyətli nəqliyyat xəttində hərəkət müvəqqəti məhdudlaşdırılıb.
Məlumata görə, Rusiyanın nəzarətində olan Krımın rəhbəri Sergey Aksyonov körpüyə hücum edildiyini açıqlayıb. Onun bildirdiyinə görə, təhlükəsizlik və hadisənin nəticələrinin aradan qaldırılması məqsədilə avtomobil hərəkətinin günorta saatlarına qədər məhdudlaşdırılması nəzərdə tutulub. Kerç şəhərində hadisə ilə bağlı əməliyyat qərargahı da yaradılıb.
Aksyonov ilkin açıqlamasında körpüyə dəyən ziyanın miqyası və mümkün itkilər barədə məlumat verməyib. Kremlin sözçüsü Dmitri Peskov isə sonrakı açıqlamasında ziyanın az olduğunu bildirib və körpüdə hərəkətin davam etdiyini qeyd edib.
Uzunluğu təxminən 19 kilometr olan Kerç körpüsü Rusiyanın materik hissəsini Krımla birləşdirir. Bu nəqliyyat xətti həm mülki daşımalar, həm də Rusiya qüvvələrinin bölgədəki təminatı baxımından strateji əhəmiyyət daşıyır.
Qeyd edək ki, körpü 2022-ci ildə Rusiyanın Ukraynaya qarşı genişmiqyaslı müharibəyə başlamasından sonra bir neçə dəfə hücumlara məruz qalıb. 2022-ci ilin oktyabrında yük avtomobilinin partladılması nəticəsində körpüyə ciddi ziyan dəymiş və hərəkət uzun müddət məhdudlaşdırılmışdı.
Hadisə ilə bağlı yayılan məlumatlar əsasən Rusiya rəsmilərinin açıqlamalarına əsaslanır.
Mənbə: mail.ru
