Sumqayıt şəhərindəki Heydər Əliyev Mərkəzində “Psixologiya və Şəxsi İnkişaf” forumu keçirilib.
Bugun.tv xəbər verir ki, tədbir “Səsdən Könüllərə Kouçinq və İnkişaf” MMC və Gənclərin İnkişaf və Karyera Mərkəzinin Abşeron-Xızı regional nümayəndəliyinin birgə təşkilatçılığı ilə baş tutub.
Maarifləndirici xarakter daşıyan forumun əsas məqsədi iştirakçıların daxili potensiallarını kəşf etmələrinə, özünəinam qazanmalarına və şəxsi inkişaf istiqamətində düzgün addımlar atmalarına dəstək olmaq olub.

Tədbir Gənclərin İnkişaf və Karyera Mərkəzinin Abşeron-Xızı regional nümayəndəliyinin rəhbəri Sevinc Qasımovanın çıxışı ilə başlayıb. O, iştirakçıları salamlayaraq gənclərə uğurlar arzulayıb. Daha sonra forumun fəxri qonağı, Azərbaycan Valideyn-Müəllim Assosiasiyasının sədri Şahin Rəcəbov açılış nitqi ilə çıxış edib.
Forumun təşkilində əsas rol oynayan “Səsdən Könüllərə Kouçinq və İnkişaf” MMC-nin qurucusu və rəhbəri Əsmər Ramizqızı da çıxış edib. Gənclər ona bu təşəbbüsə görə təşəkkürlərini bildirib, yaradılan platformanın yeni ideyaların üzə çıxmasına və gənclərin inkişafına töhfə verəcəyinə inamlarını ifadə ediblər.

Əsmər Ramizqızı isə forumun ideya rəhbərləri Selena İsmayılova və Arzu Qafurovaya təşəkkür edərək onların gənclər üçün nümunə olduğunu vurğulayıb.
Tədbirdə xüsusi dəvət olunmuş spikerlər və gənc iştirakçılar çıxış edərək şəxsi inkişaf, psixologiya və özünəinam mövzularında fikirlərini bölüşüblər. Forumun bədii hissəsində Azərbaycan Mədəniyyəti Sosial Şəbəkə Platformasının gənc xanəndələrinin ifaları təqdim olunub. Platformanın rəhbəri Yeganə Cavadova da çıxış edərək gənclərə yaradılan bu imkanlara görə Əsmər Ramizqızına minnətdarlığını bildirib.

Böyük maraqla qarşılanan forum faydalı müzakirələr, interaktiv dialoqlar və ruhlandırıcı çıxışlarla yadda qalıb.
Qeyd edək ki, “Bugün TV media qurumu” forumun media tərəfdaşı olub.





