Hindistanın nefti milli valyuta ilə almaq cəhdləri vəsaitlərin geri qaytarılmasında çətinliklər və yüksək əməliyyat xərcləri səbəbindən əksər təchizatçıların dəstəyini qazanmayıb.

Bugun.tv “Business Standard” qəzetinə istinadla xəbər verir ki, bu barədə Hindistanın Neft və Təbii Qaz Nazirliyinin parlamentə təqdim etdiyi hesabatda deyilir.

“Bir neçə ölkədən neftin rupi ilə alınmasında müəyyən uğurlara baxmayaraq, ixracatçılar Hindistan valyutasından istifadə etməkdən yayınır”, – deyə hesabatda bildirilir.

Nazirliyin məlumatına görə, son maliyyə ilində Hindistanın dövlət şirkətləri tərəfindən neft idxalı üçün heç bir rupi hesablaşmaları olmayıb. Təchizatçıların yerli valyutanın repatriasiyası ilə bağlı narahatlıqları artırmağa davam edir.

Qeyd edək ki, Hindistan Mərkəzi Bankı 2022-ci il iyulun 11-də rupini beynəlmiləlləşdirmək məqsədilə neft tədarükü əməliyyatlarında yerli valyuta ilə hesablaşmalara icazə verib.

2022-2023-cü maliyyə ilində (2022-ci ilin aprelindən 2023-cü ilin martınadək) Hindistan 232,7 milyon ton neft idxal etmək üçün 157,5 milyard dollar xərcləyib. Həmin dövr ərzində Hindistan bazarında İraq, Səudiyyə Ərəbistanı, Rusiya və Birləşmiş Ərəb Əmirlikləri ən böyük neft tədarükçüləri olub. Dehli son maliyyə ilində Yaxın Şərqdən azı 141,2 milyon ton neft idxal edib ki, bu da bütün tədarüklərin 58 faizinə bərabərdir.