Bugun.tv xəbər verir ki, ABŞ-ın vasitəçiliyi ilə Vaşinqtonda keçirilən danışıqlar zamanı Livan və İsrail nümayəndə heyətləri atəşkəs rejiminin tətbiqi ilə bağlı razılıq əldə ediblər.
ABŞ Dövlət Departamentinin yaydığı birgə bəyanatda bildirilib ki, görüşlər iyunun 2-3-də baş tutub. Razılaşmaya əsasən, atəşkəsin qüvvəyə minməsi üçün Hizbullahın bütün hücumları dayandırılmalı və təşkilatın silahlı üzvləri Cənubi Litani bölgəsindən çıxarılmalıdır.
Sənədə görə, tərəflər ABŞ-ın dəstəyi ilə Livan Silahlı Qüvvələrinin nəzarətində olacaq xüsusi pilot zonaların yaradılması barədə də razılığa gəliblər. Həmin ərazilərdə yalnız dövlət strukturlarının fəaliyyət göstərməsi nəzərdə tutulur.
Bəyanatda qeyd olunur ki, bu addımlar regionda uzunmüddətli sabitliyin və təhlükəsizliyin təmin olunmasına yönəlib. Tərəflər həmçinin siyasi və təhlükəsizlik məsələlərinin müzakirəsi məqsədilə iyunun 22-si həftəsində yenidən görüş keçirmək barədə razılığa gəliblər.
ABŞ tərəfi isə danışıqlar prosesində vasitəçilik missiyasını davam etdirəcəyini və tərəflər arasında əlaqələndirməni təmin edəcəyini bildirib.
Mənbə: TASS