Bugun.tv xəbər verir ki, ABŞ-da qadın hüquqları uğrunda mübarizənin ən tanınmış simalarından biri, jurnalist və fəal Gloria Steinem 92 yaşında vəfat edib.
Associated Press-in məlumatına görə, Steinem Nyu-Yorkda dünyasını dəyişib. O, altı onillikdən artıq müddət ərzində qadın hüquqları, gender bərabərliyi və sosial ədalət məsələləri ilə bağlı fəaliyyət göstərib.
Steinem jurnalist kimi fəaliyyətə başladıqdan sonra ABŞ-da qadınların hüquqları ilə bağlı hərəkatın aparıcı simalarından birinə çevrilib. O, 1972-ci ildə yaradılan “Ms.” jurnalının həmtəsisçisi olub. Jurnal qadın hüquqları və cəmiyyətdə qadınların roluna dair müzakirələrin genişlənməsində mühüm rol oynayıb.
Steinem eyni zamanda Milli Qadın Siyasi Qrupu təsis edən fəallardan biri olub və müxtəlif illərdə qadınların siyasi və sosial hüquqlarının genişləndirilməsi istiqamətində kampaniyalarda iştirak edib.
O, reproduktiv hüquqlar, gender bərabərliyi və qadınlara qarşı zorakılıqla mübarizə kimi məsələləri də beynəlxalq gündəmə gətirib.
Steinem 2017-ci ildə ABŞ-da keçirilən Qadınlar yürüşündə də çıxış edib. Onun vəfatı ilə bağlı ABŞ-ın müxtəlif siyasi və ictimai xadimləri qadın hüquqları hərəkatına verdiyi töhfələri yüksək qiymətləndiriblər.
Mənbə: Associated Press