Vaşinqton şəhərində yerləşən ABŞ Konqresi binasında İranla bağlı mümkün hərbi addımlara etiraz olaraq keçirilən aksiya polis müdaxiləsi ilə başa çatıb.
Özlərini “Savaş Qarşıtı Qazilər” adlandıran qrupun təşkil etdiyi etiraz zamanı çox sayda iştirakçı saxlanılıb. Aksiya xüsusilə Konqres binasının “Cannon Rotunda” adlanan əsas zalında baş tutub.
Etirazçılar ABŞ hərbi formasında çıxış edərək İranla müharibəyə qarşı olduqlarını bildirən plakatlar qaldırıblar. “Daha bir müharibəyə dözə bilmərik” və “İranla müharibəni dayandırın” kimi şüarlar səsləndirilib.
Aksiyada əlil şəxslərin – o cümlədən qoltuqağacı və əlil arabası ilə iştirak edənlərin olması diqqət çəkib. Bu, etirazın sosial və simvolik təsirini daha da artırıb.Sosial şəbəkələrdə yayılan görüntülərdə paytaxt polisi tərəfindən etirazçıların plastik qandallarla saxlanıldığı əks olunub. Xəbərdə həmçinin qeyd olunur ki, aksiya iştirakçıları müdaxiləyə müqavimət göstərmədən, sakit şəkildə etirazlarını davam etdiriblər.
Etiraz zamanı ABŞ milli marşı səsləndirilib, müharibələrdə həlak olan əsgərlərin xatirəsi anılıb və simvolik bayraq qatlama mərasimi keçirilib.
Məlumata görə, aksiyanın İslamabad şəhərində ABŞ və İran arasında keçirilməsi planlaşdırılan danışıqların ikinci mərhələsi ilə eyni günə təsadüf etməsi diqqət çəkib.
Ekspertlər isə bu etirazı ABŞ ictimaiyyətində mümkün hərbi əməliyyatlara qarşı artan narazılığın göstəricisi kimi qiymətləndirirlər.
Mənbə: Ensonhaber