Bugun.tv xəbər verir ki, ABŞ-ın müdafiə naziri Pit Heqseth Vaşinqtonun Ukraynaya münasibətinin dəyişmədiyini bildirib. Bu açıqlama Ukraynanın tələb etdiyi “Patriot” hava hücumundan müdafiə sistemlərinin göndərilməsinə icazə verilmədiyi barədə xəbərlərdən sonra səsləndirilib.
“TRT Haber”in “The Hill” nəşrinə istinadən yaydığı məlumata görə, Heqseth Viskonsin ştatında jurnalistlərin suallarını cavablandırarkən mediada Müdafiə Nazirliyi ilə bağlı yayılan bəzi məlumatların doğru olmadığını deyib.
Nazir Ukraynanın müharibədə ciddi müqavimət göstərdiyini qeyd edib. O, əvvəlki ABŞ administrasiyası dövründə Kiyevə böyük həcmdə hərbi yardım göstərildiyini, bunun nəticəsində ABŞ-ın öz silah və sursat ehtiyatlarının da azaldığını bildirib. Hazırda həmin ehtiyatların yenidən artırıldığını vurğulayıb.
Heqsethin sözlərinə görə, ABŞ Prezidenti Donald Tramp müharibənin dayandırılmasını və tərəflərin razılığa gəlməsini istəyir.
Nazir, həmçinin Ukraynanın “Starshield” peyk rabitə sistemi ilə bağlı açıqlamalarına toxunaraq, ABŞ tərəfindən xidmətin dayandırılması barədə göstəriş verilmədiyini bildirib. “Patriot” sistemlərinin göndərilməsi ilə bağlı yekun qərarın verilib-verilmədiyi barədə isə məqalədə qəti təsdiq yer almır.
Mənbə: TrtHaber