ABŞ artan hərbi xərclər və sursat çatışmazlığı fonunda strateji seçim dilemması ilə üzləşib. Bu barədə The New York Times (NYT) nəşri məlumat yayıb.
Qəzetin yazdığına görə, Yaxın Şərqdəki münaqişələr zamanı istifadə olunan böyük həcmdə silah-sursat ABŞ-ın hərbi ehtiyatlarını əhəmiyyətli dərəcədə azaldıb. Bu isə Vaşinqtonu hərbi prioritetlərini yenidən nəzərdən keçirməyə məcbur edir.
ABŞ ordusunun ehtiyatlarında müəyyən silah növləri kifayət qədər olsa da, xüsusilə hava hücumundan müdafiə və yerüstü hücum sistemləri üçün kritik sursatların çatışmazlığı müşahidə olunur. Bu barədə təqaüddə olan dəniz piyadaları polkovniki, Strateji və Beynəlxalq Tədqiqatlar Mərkəzi-nin baş müşaviri Mark Kansian da NYT-yə açıqlamasında bildirib.
Onun sözlərinə görə, bu çatışmazlıq ABŞ-ın xüsusilə Asiya-Sakit okean regionunda döyüş hazırlığına mənfi təsir göstərə bilər.
Digər tərəfdən, The Wall Street Journal yazır ki, ABŞ İranla bağlı əməliyyatlar zamanı 1000-dən çox “Tomahawk” raketi, eləcə də THAAD və Patriot hava müdafiə sistemləri üçün 1500–2000 arası tutucu raket istifadə edib. Bu ehtiyatların tam bərpasının isə bir neçə il çəkə biləcəyi qeyd olunur.
Ekspertlər hesab edir ki, mövcud vəziyyət ABŞ qarşısında ciddi seçim yaradır: hərbi resursları Yaxın Şərqdə saxlamaq, yoxsa diqqəti daha çox Asiya regionuna yönəltmək. Bu qərar ölkənin gələcək qlobal strategiyasında mühüm rol oynayacaq.
Mənbə: TASS