Türk Əməkdaşlıq və Koordinasiya Agentliyinin (TİKA) dəstəyi ilə həyata keçirilən layihə çərçivəsində Azərbaycanın qədim xalqlarından olan Alban-Udi Xristian icmasının din xadimləri İstanbul və Mardində dini təlimlərə qatılıblar.
TİKA-nın dəstəklədiyi layihə çərçivəsində Qəbələ vilayətinin Nic qəsəbəsindəki Çotari kilsəsində fəaliyyət göstərən Alban-Udi din xadimləri İstanbuldakı Süryani və Anadolu pravoslav kilsələrini, Mardindəki Deyrulzafaran monastırını ziyarət edərək, dini maarifləndirmə və ənənəvi mərasimlər haqqında məlumat alıblar.
Layihə ilə bağlı açıqlama verən TİKA-nın Bakı Proqram Koordinatoru Hayrettin Özçelik “Azərbaycanın mədəni zənginliyini və tolerantlığını heç bir ayrı-seçkiliyə yol vermədən qoruyub saxlamaq, ölkəmizlə Azərbaycan arasındakı mədəni-mənəvi əlaqələrə fərqli bir bağ gətirmək üçün bu və buna bənzər layihələri həyata keçiririk” deyib.
Ötən il TİKA tərəfindən Çotari kilsəsində Alban-Udi xristian icması üçün təhsil mərkəzi yaradılıb.
