Bugun.Tv xəbər verir ki, beynəlxalq mütəxəssislərin qənaətinə görə, insanın ailəsi, dostları və etibar etdiyi şəxslərlə möhkəm münasibətləri onun həyat məmnunluğunda mühüm rol oynayır. Araşdırmaçılar bildirirlər ki, maddi təminat vacib olsa da, əsas ehtiyaclar ödənildikdən sonra gəlirin artması insanın xoşbəxtlik səviyyəsinə əvvəlki qədər təsir göstərməyə bilər.
“Mail.ru”nun SciTechDaily-yə istinadən yaydığı məlumata görə, xoşbəxtlik elmi sahəsində çalışan 13 beynəlxalq mütəxəssis öz araşdırmalarını və uzunillik təcrübələrini bir araya gətirib. Onların ümumi elmi təcrübəsi 600 ildən çoxdur. Mütəxəssislərin müzakirələri əsasında hazırlanan məqalə Journal of Happiness Studies elmi jurnalında dərc olunub.
Xoşbəxtliyi artıran gündəlik vərdişlər
Tədqiqatçılar xoşbəxtliyin yalnız daim sevinc hiss etmək və çətinliklərdən uzaq olmaq demək olmadığını vurğulayırlar. İnsan öz dəyərlərinə uyğun yaşamaqla, çətinliklərin öhdəsindən gəlməyi öyrənməklə və yaxınları ilə münasibətlərini qorumaqla həyat məmnunluğunu artıra bilər.
Mütəxəssislərin diqqət çəkdiyi faydalı vərdişlər arasında minnətdarlıq bildirmək, gündəlik həyatın xoş anlarını qiymətləndirmək, könüllü fəaliyyətlərdə iştirak etmək və başqalarına kömək etmək də var.
Araşdırmaçılar qeyd edirlər ki, başqalarına qayğı göstərmək və insanlarla sosial əlaqələri gücləndirmək həm fərdin öz rifahına, həm də cəmiyyətin ümumi sağlamlığına müsbət təsir edə bilər.
Bununla belə, xoşbəxtliyə təsir edən amillər insandan-insana dəyişir və bu nəticələri hər kəs üçün dəyişməz qayda kimi qəbul etmək olmaz.
Mənbə: Mail.ru