ABŞ alimləri mobil telefonların uşaqlarda oxuduqlarını anlama qabiliyyətinə təsirini araşdırıblar. Tədqiqatda müxtəlif məktəblərdə oxuyan uşaqlar, o cümlədən evdə ingilis dilində danışılmayan ailələrdən olan şagirdlər iştirak edib.
Amerikalı psixoloqlar mobil telefonların uşaqların mətnləri anlama bacarığına necə təsir etdiyini öyrəniblər. Araşdırmaya Los-Anceles dairəsində yerləşən müxtəlif məktəblərin üçüncü və altıncı sinif şagirdləri cəlb olunub.
Uşaqlara qısa mətn parçaları oxumaq tapşırılıb, daha sonra isə onların mətni nə dərəcədə başa düşdükləri yoxlanılıb. Tədqiqatçılar uşağın şəxsi telefonunun olub-olmadığını və ondan nə qədər müddət istifadə etdiyini də nəzərə alıblar.
Alimlər müəyyən ediblər ki, mobil telefonu olan uşaqlarda oxuduğunu anlama göstəriciləri orta hesabla telefonu olmayan uşaqlarla müqayisədə daha aşağıdır. Bununla yanaşı, uşaqların telefonu məktəbə gətirib-gətirməməsi və bildirişlər alıb-almaması nəticələrə təsir etməyib. Həmçinin uşağın telefona hansı yaşda sahib olması da əsas amil olmayıb.
Professor Patrisiya Qrinfildin sözlərinə görə, məhz telefonun mövcudluğu faktı oxu nəticələrinin aşağı olması ilə əlaqələndirilir. Bu vəziyyət həm üçüncü, həm də altıncı sinif şagirdlərində müşahidə olunub.
Bununla yanaşı, araşdırmada müsbət tərəf də üzə çıxıb. Evdə ingilis dilində danışılmayan ailələrdən olan uşaqlar üçün erkən yaşda telefon vasitəsilə mesaj yazmağa başlamaq faydalı ola bilər. Belə şagirdlər ikinci və ya üçüncü sinifdə mətn mesajları yazmağa başlayanda, altıncı sinfə çatdıqda onların oxuduğunu anlama nəticələri telefondan istifadə etməyən yaşıdlarının göstəricilərinə yaxın olub.
Tədqiqat məktəblərdə telefonların qadağan edilməsinin oxu üzrə nəticələri mütləq yaxşılaşdıracağını təsdiqləməyib. Lakin alimlər hesab edirlər ki, bu cür məhdudiyyətlər uşaqların sosial bacarıqlarının inkişafına kömək edə bilər. Çünki bu halda şagirdlər müəllimlər və sinif yoldaşları ilə daha çox canlı ünsiyyət qura bilərlər.
Mütəxəssislər bildirirlər ki, mobil telefonların uşaqların inkişafına təsiri ilə bağlı daha çox araşdırmaya ehtiyac var.
Mənbə: Mail.ru Science