Bugun.tv xəbər verir ki, alimlər 2026-cı ildə keçiriləcək 2026 FIFA Dünya Kuboku zamanı futbolçular və azarkeşlərin təhlükəli isti hava şəraiti ilə üzləşə biləcəyi barədə xəbərdarlıq ediblər.
World Weather Attribution təşkilatının hazırladığı analizdə bildirilib ki, ilk dəfə 3 ölkədə və 48 komandanın iştirakı ilə təşkil olunacaq turnir zamanı qlobal istiləşmənin yaratdığı risklər ciddi problemə çevrilə bilər. İqlim modellərinə əsaslanan araşdırma göstərib ki, insan fəaliyyəti nəticəsində yaranan iqlim dəyişikliyi yüksək temperatur və rütubəti əhəmiyyətli dərəcədə artırıb.
Araşdırmaya görə, turnirdə keçiriləcək 104 oyunun təxminən 25 faizi təhlükəli istilik səviyyəsində oynanıla bilər. Bildirilir ki, bəzi qarşılaşmalarda temperatur göstəriciləri futbolçuların sağlamlığı üçün təhlükəli hesab olunan həddi keçəcək.
Mütəxəssislər xüsusilə Miami, Kansas City, New York və Philadelphia şəhərlərində keçiriləcək oyunlarda riskin yüksək olduğunu vurğulayıblar. Qeyd olunub ki, bəzi stadionlarda soyutma sistemlərinin olmaması vəziyyəti daha da çətinləşdirə bilər.
Alimlər hesab edir ki, turnirin final mərhələsində belə təhlükəli istilik göstəricilərinin yaranma ehtimalı var. Ekspertlər FIFA və təşkilatçıları əlavə təhlükəsizlik tədbirləri görməyə çağırıblar.
Mənbə: TRT Haber