Politoloq Aqil Məmmədov ABŞ Prezidenti Donald Trampın İranla əməkdaşlıq edən bütün ölkələrə qarşı 25 faiz həcmində gömrük rüsumlarının tətbiq ediləcəyi ilə bağlı bəyanatını şərh edib.
Onun sosial media hesabında paylaşımındakı şərhinə görə, bu açıqlama son dərəcə sərt xarakter daşıyır. Eyni zamanda qlobal ticarət sisteminə açıq ultimatumdur. Politoloq hesab edir ki, Vaşinqton bu yanaşma ilə faktiki olaraq digər dövlətlərə hansı ölkə ilə münasibət qurub-qurmamağı diktə etməyə çalışır.
“Bu, digər ölkələrə kiminlə əməkdaşlıq edə biləcəklərini, kiminlə münasibət saxlamayacaqlarını demək cəhdidir. Əgər ABŞ bu siyasəti real şəkildə həyata keçirərsə, İran üzərində iqtisadi təzyiq daha da kəskinləşəcək. Bu vəziyyət reanimasiyada olan ağır xəstənin süni nəfəs aparatından ayrılmasına bənzəyir”, – deyə Aqil Məmmədov bildirib.
Politoloqun fikrincə, Tehran Vaşinqtonun bu addımına cavab olaraq strateji əhəmiyyətə malik Hörmüz boğazını bağlamaq variantını gündəmə gətirə bilər. “Belə bir ssenari reallaşarsa, yalnız neft qiymətləri deyil, eyni zamanda qlobal logistika marşrutları da ciddi şəkildə zərər görəcək və beynəlxalq ticarətdə xaotik vəziyyət yaranacaq”, – deyə o vurğulayıb.
Aqil Məmmədov hesab edir ki, mövcud proseslər ABŞ–İran qarşıdurmasının təkcə regional deyil, qlobal iqtisadi təhlükəsizlik üçün də ciddi risklər yaratdığını göstərir.