Bugun.tv xəbər verir ki, alimlər Arktika dəniz buzlarının hərəkəti ilə bağlı uzun müddətdir cavabı tam aydın olmayan məsələyə yeni izah veriblər. Kaliforniya Universitetinin Riversayd bölməsinin rəhbərlik etdiyi araşdırmaya əsasən, buz parçalarının hərəkətinə yalnız külək deyil, onların bir-biri ilə toqquşması da ciddi təsir göstərir.
UC Riverside-ın məlumatına görə, Arktika vahid və bütöv buz təbəqəsindən ibarət deyil. Buradakı buzlar ölçüləri bir neçə metrdən bir neçə kilometrə qədər dəyişən ayrı-ayrı hissələrdən formalaşır. Külək bu buz parçalarını hərəkətə gətirsə də, onların yayılma sürəti sadə külək modellərinin proqnozlaşdırdığından fərqli olur.
Tədqiqatçılar kompüter modeli hazırlayaraq buz parçalarını bir-biri ilə toqquşan hissəciklər kimi təsəvvür ediblər. Modeldə küləyin təsiri ilə yanaşı, okeanın müqaviməti və buz parçalarının toqquşmaları da nəzərə alınıb.
Nəticələr göstərib ki, buzların bir-birinə dəyməsi onların sürətinə və yayılmasına ciddi təsir edir. Alimlər bu model vasitəsilə Arktik buzlarının hərəkəti ilə bağlı əvvəllər izahı çətin olan bir neçə göstəricini uyğunlaşdırmağın mümkün olduğunu bildiriblər.
Araşdırmanın müəllifləri hesab edirlər ki, bu yanaşma gələcəkdə Arktika buzlarının hansı istiqamətdə və hansı sürətlə hərəkət edəcəyini daha yaxşı proqnozlaşdırmağa kömək edə bilər. Eyni zamanda, əldə olunan nəticələr iqlim modellərində də istifadə oluna bilər.
Mənbə: ScienceDaily