Avropa Birliyi Rusiyanı çirkli pulların yuyulması riski səbəbilə qara siyahıya daxil edib.
Bu barədə AB-nin Xarici Əlaqələr və Təhlükəsizlik Siyasəti üzrə ali nümayəndəsi Kaja Kallas bildirib.
AB Xarici İşlər Nazirləri toplantısından sonra açıqlama verən Kallas qeyd edib ki, bu qərar Rusiya bankları ilə aparılan maliyyə əməliyyatlarını ləngidəcək və xərcləri artıracaq. Onun sözlərinə görə, Moskva sülhə nail olmaq üçün real addımlar atmır və müharibədə qışı “silah”a çevirir.
Kallas həmçinin Rusiya ordusunda döyüşmüş keçmiş hərbçilərin Şengen zonasına girişinin qadağan edilməsi təklifinin üzv ölkələrin əksəriyyəti tərəfindən dəstəkləndiyini açıqlayıb.
Rusiyaya qarşı diplomatik dialoqun mümkünlüyü ilə bağlı suala cavab verən Kallas bildirib ki, Moskvanın artıq ABŞ-la əldə etdiyi razılaşmalar fonunda AB-dən əlavə güzəşt gözləməsi üçün səbəb yoxdur.
Mənbə: Ensonhaber