Bugun.tv xəbər verir ki, Avropa İttifaqı üzv ölkələrin dövlət qurumlarına və kritik infrastrukturlarına qarşı həyata keçirildiyi bildirilən kiberhücumlara görə Rusiyaya qarşı yeni sanksiyalar paketi qəbul edib.
AP News-un məlumatına görə, Aİ xarici işlər nazirlərinin Brüsseldə keçirilən toplantısında qəbul edilən qərarla Rusiya hərbi kəşfiyyatı ilə əlaqəli olduğu bildirilən 9 fiziki şəxs və 4 hüquqi şəxs sanksiya siyahısına daxil edilib.
Avropa İttifaqının xarici siyasət və təhlükəsizlik məsələləri üzrə ali nümayəndəsi Kaya Kallas bildirib ki, sözügedən şəxslər və qurumlar uzun illər ərzində Avropa ölkələrində dövlət qurumlarına, enerji infrastrukturlarına və digər mühüm obyektlərə qarşı həyata keçirilən kiberhücumlarla əlaqələndirilir.
Yeni qərara əsasən, sanksiya siyahısına daxil edilən şəxslərin Aİ ölkələrindəki aktivləri dondurulacaq, onların İttifaq ərazisinə girişinə qadağa qoyulacaq və Avropa vətəndaşları ilə maliyyə əlaqələri məhdudlaşdırılacaq.
Aİ rəsmiləri bildiriblər ki, məqsəd üzv ölkələrin kibertəhlükəsizliyini gücləndirmək və xarici müdaxilələrə qarşı vahid mövqe nümayiş etdirməkdir. Analitiklərin fikrincə, yeni sanksiyalar Avropa İttifaqı ilə Rusiya arasında rəqəmsal təhlükəsizlik sahəsində gərginliyi daha da artıracaq.
Mənbə: ApNews