Azərbaycan Xarici İşlər Nazirliyi İsrail tərəfindən İrana qarşı son hərbi əməliyyatlardan ciddi narahatlıq ifadə edib. Nazirlik tərəfindən yayılan rəsmi bəyanatda bildirilir ki, Azərbaycanın mövqeyi beynəlxalq hüquq normalarına uyğun olaraq tərəflərin yalnız dialoq və diplomatik vasitələrlə mövcud fərqlilikləri həll etməsinin vacibliyini vurğulayır. Eyni zamanda, sivil əhalinin və mülki infrastrukturların qorunmasının əhəmiyyəti xüsusi qeyd olunub.
Bəyanatda həmçinin vurğulanır ki, Yaxın Şərqdə vəziyyətin daha da gərginləşməsinin qarşısını almaq üçün beynəlxalq mexanizmlər çərçivəsində diplomatik əlaqələrin davam etdirilməsi vacibdir. İsrailin hücumu çərçivəsində 200 təyyarə İranın nüvə proqramı və uzaqmənzilli raket qabiliyyətlərini hədəfə alıb, hücum nəticəsində yüksək rütbəli hərbi rəsmilər və nüvə alimləri həlak olub.
Mənbə: Anadolu Agentliyi