“Biz etnik təmizləmə siyasətinin qurbanı olmuş qərbi azərbaycanlıların öz vətənlərinə qayıtmasının başlamasına dözə bilməyən Ermənistanı regionda formalaşmış reallığı tanımağa, sülh əldə etmək imkanlarını itirməməyə çağırırıq”.
Bugun.tv xəbər verir ki, bu barədə Azərbaycan XİN-nin Ermənistanın Xarici İşlər Nazirliyinin dünənki bəyanatını şərh edən məlumatda bildirilib.
“Ermənistan Xarici İşlər Nazirliyinin bəyanatı, qərbi azərbaycanlıların geri qayıtmasına mane olmaq siyasətindən əl çəkmədiyini nümayiş etdirir. Nikol Paşinyanın ritorikası və hərəkətləri göstərir ki, İrəvan sülh üçün bu tarixi şansdan yenə də yararlanmaq istəmir. Ermənistan üçtərəfli razılaşmanı pozaraq, silahlı qüvvələrini Azərbaycanın suveren ərazisindən tam olaraq çıxarmır”,- şərhdə deyilir.
“Biz bir daha Ermənistanı məsuliyyətli davranış nümayiş etdirməyə, 44 günlük müharibədən sonra yaranmış sülhün əldə olunması imkanlarına xələl gətirən təxribat və bəyanatlardan, yalançı ritorikadan imtina etməyə çağırırıq”, – XİN-dən bildirilib.
Qeyd edək ki, şənbə günü Ermənistan Xarici İşlər Nazirliyi rəsmi Bakını “İrəvana qarşı yeni təcavüz planı hazırlamaqda” və “Dağlıq Qarabağ ərazilərində erməni izlərini aradan qaldırmaq məqsədilə azərbaycanlıların köçürülməsi proqramını həyata keçirməkdə” ittiham edən bəyanat yayıb.
Mənbə:TASS