Azərbaycan Belçika və Niderland parlamentlərində qəbul edilən qərarlara görə bu ölkələrin Bakıda fəaliyyət göstərən səfirlərini Xarici İşlər Nazirliyinə çağırıb.
Azərbaycan Xarici İşlər Nazirliyinin açıqlamasına əsasən, Belçikanın Bakıdakı səfiri Julien de Fraipont və Niderlandın səfiri Marianne de Jong ayrı-ayrılıqda nazirliyə dəvət olunublar.
Görüşlər zamanı aprelin 16-da Belçika və Niderland parlamentlərində qəbul edilən sənədlərə sərt etiraz bildirilib. Rəsmi Bakı hesab edir ki, həmin sənədlər Azərbaycanın suverenliyi və ərazi bütövlüyünü, eləcə də Ermənistanla davam edən sülh prosesini zədələməyə yönəlib.
Açıqlamada qeyd olunub ki, bu qərarlar tamamilə əsassız və qərəzli iddialar üzərində qurulub və bu, bəzi dairələrdə kök salmış anti-Azərbaycan mövqeyini açıq şəkildə göstərir.
Eyni zamanda vurğulanıb ki, sənədlərdə yer alan iddialar beynəlxalq hüququn pozulması və hüququn aliliyinə müdaxilə kimi qiymətləndirilir.
Görüşlərdə Azərbaycanın suveren əraziləri ilə bağlı əsassız fikirlər, Ermənistanın ərazi bütövlüyünün pozulduğuna dair iddialar, eləcə də erməni əsilli şəxslərin hüquqları və guya qanunsuz həbslərlə bağlı ittihamlar qətiyyətlə rədd edilib.
Diplomatların diqqətinə çatdırılıb ki, bu qərarların Azərbaycan və Ermənistan parlament rəhbərləri arasında keçirilən son görüşlə eyni vaxta təsadüf etməsi “paradoksal” xarakter daşıyır.
Azərbaycan tərəfi Belçika və Niderlandı öz parlamentlərindəki anti-Azərbaycan qrupların ikitərəfli münasibətlərə zərər verməsinin qarşısını almaq üçün konkret addımlar atmağa çağırıb.
Qeyd edək ki, Belçika və Niderland parlamentləri Qarabağı tərk edən ermənilərin geri qayıtması ilə bağlı qərarlar qəbul etmişdi.
Mənbə: TrtHaber