Beynəlxalq Cinayət Məhkəməsi ABŞ administrasiyasının məhkəmənin rəhbəri və yüksək vəzifəli hüquqşünasına qarşı sanksiya tətbiq etməsini qurumun müstəqilliyinə “açıq hücum” adlandırıb.
Bugun.tv xəbər verir ki, Beynəlxalq Cinayət Məhkəməsi (BCM) ABŞ Prezidenti Donald Tramp administrasiyasının məhkəmənin rəhbəri Tomoko Akane və yüksək vəzifəli məhkəmə hüquqşünası Abdoulaye Seye qarşı sanksiya tətbiq etməsinə sərt reaksiya verib.
“Al Jazeera”nın məlumatına görə, məhkəmə ABŞ-ın bu addımını müstəqil və qərəzsiz məhkəmə institutunun müstəqilliyinə ciddi hücum kimi qiymətləndirib. BCM bildirib ki, hakimlərə, prokurorlara və digər əməkdaşlara qarşı bu cür tədbirlər hüququn aliliyinə zərər vurur.
Tomoko Akane 2024-cü ilin martından Beynəlxalq Cinayət Məhkəməsinin prezidentidir. Abdoulaye Seye isə məhkəmədə yüksək vəzifəli hüquqşünas kimi fəaliyyət göstərir.
ABŞ administrasiyası isə Beynəlxalq Cinayət Məhkəməsini siyasiləşmiş və korrupsiyaya uğramış qurum hesab etdiyini bildirir. Vaşinqtonun BCM-yə qarşı təzyiq kampaniyası əsasən məhkəmənin İsraillə bağlı araşdırmaları və qərarları fonunda güclənib.
Məhkəmə həmçinin ABŞ administrasiyasının digər ölkələri Beynəlxalq Cinayət Məhkəməsindən çıxmağa təşviq etməsindən narahatlığını ifadə edib. BCM-nin fikrincə, belə addımlar dövlətlərin beynəlxalq cinayətlərə görə məsuliyyət daşıyan şəxslərin məhkəmə qarşısında cavab verməsini təmin etmək istiqamətindəki ümumi səyləri zəiflədə bilər.
Beynəlxalq Cinayət Məhkəməsi ABŞ və İsrail tərəfindən tanınmasa da, məhkəmə müəyyən hallarda bu ölkələrin vətəndaşları ilə bağlı araşdırmalar aparmaq səlahiyyətinə malik olduğunu bildirir.
BCM ABŞ-ın tətbiq etdiyi sanksiyalara baxmayaraq fəaliyyətini davam etdirəcəyini və beynəlxalq hüquq çərçivəsində üzərinə düşən vəzifələri yerinə yetirəcəyini açıqlayıb.
Mənbə: Aljazeera.Com