Bugun.tv xəbər verir ki, ABŞ-ın İran ətrafında həyata keçirdiyi dəniz blokadasının ölkənin hərbi resurslarına və digər bölgələrdəki imkanlarına təzyiq göstərdiyi bildirilir. Bloomberg-in təhlilinə görə, əməliyyat həm maliyyə, həm də şəxsi heyət və hərbi texnika baxımından ABŞ üçün əlavə yük yaradır.
Bloomberg Economics-in təhlilinə əsasən, İranın dəniz blokadasında ən azı 28 ABŞ Hərbi Dəniz Qüvvələri gəmisi növbəli şəkildə iştirak edib. Hazırda isə təxminən 22 gəmi İranla əlaqəli olduğu bildirilən və Hörmüz boğazından keçməyə çalışan gəmiləri dayandırır və istiqamətləndirir. Təhlildə blokadanın gündəlik xərcinin təxminən 32,5 milyon dollar olduğu, əməliyyatların iyulun 14-də başlamasından sonra gəmi istismarı üzrə xərclərin isə 2 milyard dolları keçdiyi qeyd olunur.
Məlumata görə, yanvar ayından Yaxın Şərqdə ABŞ hərbi mövcudluğunun gücləndirilməsi ilə bağlı gəmi istismar xərcləri 7,1 milyard dolları ötüb. Blokadada ABŞ Hərbi Dəniz Qüvvələrinin döyüş gəmilərinin 30 faizindən çoxunun iştirak etdiyi bildirilir.
Bloomberg yazır ki, ABŞ müxtəlif regionlardan gəmilər və digər hərbi imkanları Yaxın Şərqə yönəltdiyi üçün Asiya-Sakit okean da daxil olmaqla digər istiqamətlərdə istifadə oluna biləcək resursların sayı azalır. Nəşrin məlumatına görə, maliyyələşdirmədə tədqiqat və inkişaf kimi bəzi sahələrdən istismar və texniki xidmət istiqamətlərinə vəsaitlərin yenidən bölüşdürülməsi də baş verir.
ABŞ-ın təqaüddə olan generalı və Mərkəzi Komandanlığın keçmiş rəhbəri Cozef Votel isə bildirib ki, Yaxın Şərqə əlavə qüvvələrin göndərilməsi Vaşinqtonun digər prioritetlərinə təsir göstərə bilər.
Nəşr həmçinin qeyd edir ki, İranın zərbələri nəticəsində regiondakı bəzi ABŞ hərbi-logistika obyektlərinin zədələnməsi gəmilərin təminatını çətinləşdirib. Bloomberg-in yazdığına görə, ABŞ Hərbi Dəniz Qüvvələri üçün bu proses yalnız maliyyə xərclərini deyil, gəmi və ekipajların uzunmüddətli döyüş hazırlığını da gündəmə gətirir.
Mənbə: mail.ru