Starmer: Zelenski ABŞ-ın sülh planının böyük hissəsini qəbul etməyə yaxınlaşır
Böyük Britaniyanın Baş naziri Keir Starmer Könüllülər Koalisiyasının onlayn iclasında çıxış edərək Ukraynanın ABŞ-ın sülh planının əsas bölməsini qəbul etməyə hazır olduğuna dair işarələr göründüyünü bildirib.
Starmer Ukraynanın uzun müddətdir Rusiya təcavüzünün nəticələrini çəkdiyini vurğulayıb və Cenevrədə keçirilən görüşü sülh prosesində vacib mərhələ adlandırıb. Onun sözlərinə görə, təqdim olunan plan Ukraynanın maraqlarını əks etdirir və Kiyev tərəfindən təklif edilən konstruktiv dəyişikliklər müsbət irəliləyiş yaradıb.
Baş nazir Ukraynanın özünü müdafiə edə bilməsinin əhəmiyyətini xüsusi qeyd edib və ABŞ-a ünvanladığı mesajda Avropa və NATO məsələlərində müttəfiqlərin razılığının vacib olduğunu xatırladıb.
Starmer təhlükəsizlik zəmanətlərinin gücləndirilməsini, çoxmillətli qüvvələrin Ukraynada yerləşdirilməsini və Rusiyaya qarşı təzyiqlərin, o cümlədən enerji embarqosunun artırılmasını zəruri sayıb. O, ABŞ-ın Rusiya neftinə tətbiq etdiyi sanksiyaların artıq real təsir göstərdiyini vurğulayıb.
Starmerin fikrincə, sülh danışıqları davam etsə də, Ukraynanın təcili hərbi və maliyyə dəstəyə ehtiyacı qalır. O, Ukraynanın təhlükəsizliyinin Avropanın öz təhlükəsizliyi üçün həlledici olduğunu vurğulayaraq, ölkənin şəhərlərini və infrastrukturu qorumaq üçün indi daha çox dəstəyə ehtiyacı olduğunu da əlavə edib.
Mənbə: Hurriyet.com