Bugun.tv xəbər verir ki, Böyük Britaniya hökumətinin əhalini mümkün fövqəladə hallara hazırlıqlı olmağa çağırmasından sonra əl ilə qurulan radiolara və digər ehtiyat ləvazimatlarına tələbat kəskin artıb. The Independent qəzetinin məlumatına görə, hökumətin evlərdə fövqəladə hallar üçün lazım olan əşyaların saxlanmasını tövsiyə edən siyahısını dərc etməsindən cəmi iki gün sonra dörd satış məntəqəsində ən azı yeddi radio modeli satılıb qurtarıb.
Hökumətin “Be Ready” adlı kampaniyası çərçivəsində sakinlərə gündəlik xidmətlərdə fasilələr yarana biləcəyi təqdirdə evdə üç günlük ehtiyat saxlamaq tövsiyə olunur. Buraya içməli su, konservləşdirilmiş qidalar, nağd pul və enerji təchizatı kəsildikdə xəbər almaq üçün batareya ilə işləyən və ya əl ilə qurulan radio daxildir.
Fənər və enerji yığıcılarına da tələbat artıb
The Independent-in The Telegraph-a istinadən yaydığı məlumata görə, elektronika satışı ilə məşğul olan Maplin şirkətində son günlər fənər satışları 284 faiz, daşınan enerji yığıcılarının satışları isə 106 faiz artıb.
Fövqəladə hallara hazırlıq üzrə araşdırma aparan “The Prepared Household” təşkilatının məlumatlarında Şotlandiya əhalinin sayına nisbətdə hazırlıq ləvazimatları ilə bağlı axtarışlara görə önə çıxıb. Qərbi Midlend bölgəsində də fənərlər, enerji yığıcıları və elektrik kəsintisi üçün nəzərdə tutulan dəstlərə maraq artıb.
Hökumət hansı ehtiyatları tövsiyə edir?
Rəsmi siyahıda hər nəfər üçün gündə təxminən üç litr içməli su olmaqla üç günlük su ehtiyatı, yemək bişirmədən istifadə edilə bilən uzun müddət xarab olmayan qidalar, konserva açacağı, əl təmizləyicisi, nəm salfetlər, fənər və ehtiyat batareyalar yer alır.
Bundan əlavə, evdə isti geyim, yorğan və yataq kisəsi, telefonu enerji ilə təmin etmək üçün daşınan enerji yığıcısı, ilkin tibbi yardım vasitələri, vacib dərmanlar, şəxsiyyət sənədlərinin surətləri və nağd pul saxlanması tövsiyə edilir. Körpəsi və ya ev heyvanı olan ailələrə onların ehtiyaclarını da nəzərə almaq məsləhət görülür.
Hökumət vətəndaşlara bütün əşyaları birdən almaq əvəzinə evdə mövcud ehtiyatları yoxlamağı və çatışmayan ləvazimatları tədricən toplamağı tövsiyə edir.
Mənbə: The Independent