Bugun.tv xəbər verir ki, Cənubi Koreya son 122 ilin ən güclü isti hava dalğası ilə üz-üzədir. Ölkənin paytaxtı Seulda tarixdə ilk dəfə ən yüksək səviyyəli istilik xəbərdarlığının elan olunacağı gözlənilir.
Məlumata görə, ölkənin cənub-şərqində yerləşən Yanqsan şəhərində havanın temperaturu 42,5 dərəcəyə çataraq müşahidələrin aparıldığı dövrdə qeydə alınan ən yüksək göstərici olub. Sinoptiklər yaxın günlərdə Seulda da temperaturun 38 dərəcəyə yüksələcəyini proqnozlaşdırırlar.
Rəsmi məlumatlara əsasən, may ayından bəri isti hava ilə əlaqədar 2 mindən çox insan xəstəxanaya müraciət edib, 19 nəfər isə həyatını itirib. Prezident Li Ce Myun vəziyyəti milli fəlakət kimi qiymətləndirərək aidiyyəti qurumlara əhalinin, xüsusilə yaşlıların və risk qrupuna daxil olan şəxslərin qorunması üçün əlavə tədbirlər görməyi tapşırıb.
Hakimiyyət orqanları küçələrin soyudulması üçün xüsusi texnikalar cəlb edib, minlərlə həssas vətəndaşın vəziyyəti nəzarətdə saxlanılır. Mütəxəssislər rekord istiləri iqlim dəyişikliyi və atmosferdə formalaşan yüksək təzyiq sistemləri ilə əlaqələndirirlər.
Mənbə: The Guardian