Bugun.tv xəbər verir ki, 2019-cu ildə Norveçdə görülən və Rusiya donanmasının öyrətdiyi “casus” balina olduğu iddia edilən ağ balina bu dəfə İsveç sahillərində görüntülənib.
İlk dəfə Norveçin Finnmark bölgəsində kəşf edilən balina bazar günü İsveçin cənub-qərb sahilindəki Hunnebostrand bölgəsində aşkar edilib.
Dəniz bioloqu Sebastian Strand balinanın təbii mühitdən sürətlə uzaqlaşdığını və bunun səbəbinin bilinmədiyini bildirib.
“Bu, onu həyat yoldaşı tapmağa vadar edən hormonlar ola bilər. Ya da tənhalıq ola bilər – çünki beluga balinaları çox sosial növdür” dedi Strand.
Sözügedən balina ilk dəfə Norveçdə peyda olanda Norveç Balıqçılıq İdarəsinin dəniz bioloqları ona bağlanmış süni bir kəmər tapdılar.
Kəmərdə hərəkət kamerasının bağlana biləcəyi mexanizm və üzərində “Avadanlıq Sankt-Peterburq” yazısı olan plastik toqqa var idi.
Moskva isə balinanın “rus casusu” olması ilə bağlı iddialara rəsmi cavab verməyib.
Mənbə: TrtHaber