Bugun.tv xəbər verir ki, Milli Məclisin deputatı Ceyhun Məmmədov 9 May – Faşizm üzərində Qələbə Günü münasibətilə sosial media hesabında paylaşım edib.
Deputat bildirib ki, bu tarix münasibətilə İkinci Dünya müharibəsində həyatını itirən insanların əziz xatirəsi dərin ehtiramla yad olunur. Onun sözlərinə görə, faşizm üzərində qazanılan tarixi qələbə milyonlarla insanın qəhrəmanlığı, iradəsi və böyük fədakarlığı nəticəsində mümkün olub.
Azərbaycan xalqının da həmin müharibədə böyük şücaət göstərdiyini vurğulayan deputat qeyd edib ki, həm cəbhədə, həm də arxa cəbhədə xalqımız qələbənin əldə olunmasına mühüm töhfələr verib. Minlərlə azərbaycanlının döyüşlərdə iştirak etdiyini bildirən Ceyhun Məmmədov xalqımızın qəhrəman oğul və qızları ilə tarix yazdığını diqqətə çatdırıb.
Paylaşımda qeyd olunub ki, 9 May həm də sülhün, həmrəyliyin və milli birliyin əhəmiyyətini bir daha xatırladır. Deputatın fikrincə, qələbə uğrunda canından keçən insanların xatirəsini yaşatmaq və onların qəhrəmanlığını gələcək nəsillərə çatdırmaq hər kəsin mənəvi borcudur.
Ceyhun Məmmədov həmçinin vurğulayıb ki, bu gün ölkədə veteranlara göstərilən diqqət və qayğı dövlət siyasətinin mühüm istiqamətlərindən biridir. Onun sözlərinə görə, veteranların keçdiyi şərəfli həyat yolu gənc nəsil üçün daim vətənpərvərlik nümunəsi olaraq qalacaq.
Sonda deputat bütün veteranları və Azərbaycan xalqını 9 May – Faşizm üzərində Qələbə Günü münasibətilə təbrik edib, ölkəyə sülh, əmin-amanlıq və firavanlıq arzulayıb.