Bugun.tv xəbər verir ki, süni intellekt şirkəti Anthropic-in hazırladığı Claude AI platformasında istifadəçilərin paylaşdıqları bəzi söhbətlərin və sənədlərin internet axtarış sistemlərində görünməsi məxfiliklə bağlı narahatlıqlara səbəb olub. Məsələ ilk dəfə istifadəçilər tərəfindən aşkar edildikdən sonra texnologiya mediasında geniş müzakirə olunmağa başlayıb.
Məlumata görə, problem Claude-un “Share Chat” (Söhbəti paylaş) funksiyası ilə yaradılan ictimai keçidlərdən qaynaqlanıb. Bu keçidlər vasitəsilə paylaşılan bəzi söhbətlər Google və Bing kimi axtarış sistemləri tərəfindən indeksləşdirilib. Nəticədə bəzi istifadəçilərin CV-ləri, maliyyə cədvəlləri, layihələri və digər məlumatları internetdə axtarış zamanı görünə bilib.
Anthropic bildirib ki, söhbətlər standart olaraq məxfi saxlanılır və yalnız istifadəçi onları paylaşmaq üçün ictimai keçid yaratdıqda əlçatan olur. Şirkət hadisədən sonra axtarış sistemlərində görünmənin qarşısını almaq üçün əlavə texniki tədbirlər gördüyünü və istifadəçilərə paylaşdıqları keçidləri nəzərdən keçirməyi tövsiyə etdiyini açıqlayıb.
Mütəxəssislər bildirirlər ki, bu hadisə süni intellekt platformalarında məxfilik və məlumat təhlükəsizliyi məsələlərinin daha ciddi şəkildə nəzərdən keçirilməsinin vacibliyini bir daha gündəmə gətirib. Onlar istifadəçilərə ictimai paylaşım funksiyalarından istifadə edərkən həssas məlumatları paylaşmamağı tövsiyə edirlər.
Mənbə: The Guardian