Bugun.tv xəbər verir ki, BMT-nin iqlim sammiti COP31 çərçivəsində qlobal enerji istehlakında elektrik enerjisinin payının 2035-ci ilədək 21 faizdən 35 faizə çatdırılması təklif edilib. Bu təşəbbüs Türkiyə və Avstraliyanın birgə irəli sürdüyü “35-ə 35” hədəfi kimi təqdim olunur. Məlumatı “Associated Press” agentliyi yayıb.
Təklifin əsas məqsədi nəqliyyatın elektrikləşdirilməsi, enerji səmərəli binaların sayının artırılması, elektrik şəbəkələrinin gücləndirilməsi və enerjiyə çıxış imkanlarının genişləndirilməsidir. Bu addımların atmosferə buraxılan istixana qazlarının azaldılmasına kömək edəcəyi gözlənilir.
Bununla belə, ekoloji və insan hüquqları təşkilatları təşəbbüsün mümkün mənfi nəticələrinə diqqət çəkirlər. Elektrik avtomobilləri, batareyalar, günəş panelləri və külək turbinləri üçün tələb olunan mineralların hasilatının artması təbiətə və yerli icmalara zərər vura bilər.
Mütəxəssislər yeni mədənlərin açılması ilə yanaşı, mövcud materialların təkrar emalına da daha çox diqqət yetirilməsini vacib sayırlar. Beynəlxalq Enerji Agentliyinin qiymətləndirməsinə görə, təkrar emalın genişləndirilməsi 2050-ci ilədək yeni mədən hasilatına ehtiyacı 25–40 faiz azalda bilər.
Mənbə: AP News