Bugun.tv xəbər verir ki, Cənubi Koreya Hörmüz boğazında gəmiçilik təhlükəsizliyinin təmin olunmasına dəstək vermək üçün hərbi variantlar da daxil olmaqla bir sıra tədbirləri nəzərdən keçirir.
Reuters agentliyinin məlumatına görə, Seul hələlik hər hansı yekun qərar qəbul etməyib. Cənubi Koreya hakimiyyəti mümkün addımların bölgədəki vəziyyətə və ölkənin təhlükəsizlik maraqlarına uyğunluğunu qiymətləndirir.
Məsələ ABŞ ilə İran arasında artan qarşıdurma fonunda gündəmə gəlib. Hörmüz boğazında yaranan təhlükəsizlik problemləri neft və digər enerji məhsullarının dünya bazarlarına daşınmasına ciddi risk yaradır. Bu marşrutdan keçən tankerlərin təhlükəsizliyi Asiya ölkələri üçün də xüsusi əhəmiyyət daşıyır.
Cənubi Koreya enerji idxalından yüksək dərəcədə asılı ölkələrdən biridir. Buna görə də Seul mümkün nəqliyyat məhdudiyyətlərinin ölkə iqtisadiyyatına təsirlərini azaltmağa çalışır.
Reuters bildirir ki, Cənubi Koreyanın atacağı addımın miqyası hələ müəyyənləşdirilməyib. Seul diplomatik və digər alternativləri də nəzərdən keçirir.
Mənbə: Reuters