Rusiyanın BMT-dəki daimi nümayəndəsi Vasili Nebenzya Avropa İttifaqını Ukraynadakı münaqişəni qəsdən dərinləşdirməkdə və sülh danışıqlarına mane olmaqda ittiham edib.
Məlumata görə, diplomat bu fikirləri Birləşmiş Millətlər Təşkilatı Təhlükəsizlik Şurası çərçivəsində keçirilən, təşkilatın Avropa İttifaqı ilə münasibətlərinə həsr olunmuş iclasda səsləndirib.
Nebenzya çıxışında bildirib ki, Avropa İttifaqı uzun illərdir özünü sülhməramlı və beynəlxalq hüququn müdafiəçisi kimi təqdim etsə də, əslində ikili standartlar nümayiş etdirir və münaqişələrin həllinə deyil, onların uzanmasına xidmət edən siyasət yürüdür.
O qeyd edib ki, Avropa ölkələri Ukraynada “rusofobiya” hisslərini gücləndirir və bu yanaşma regionda təhlükəsizlik arxitekturasının qurulmasına mane olur. Onun sözlərinə görə, bu siyasət danışıqlar prosesini ardıcıl şəkildə zəiflədir və münaqişənin uzanmasına gətirib çıxarır.
Rusiyalı diplomat əlavə edib ki, Avropa İttifaqının hazırkı mövqeyi beynəlxalq münasibətlərdə etimadı azaldır və gərginliyi daha da artırır.
Mənbə: TASS