ABŞ prezidenti Donald Trump İrana qarşı planlaşdırılan hərbi zərbələrin müvəqqəti dayandırıldığını açıqlayıb. O bildirib ki, bu qərar İran ilə aparılan “çox yaxşı və məhsuldar” danışıqlardan sonra verilib.
Tramp CNN-ə açıqlamasında qeyd edib ki, tərəflər arasında 15 maddədən ibarət mümkün razılaşma üzərində müzakirələr gedir. O, daha əvvəl Hörmüz boğazının açılmaması halında hərbi zərbələr endiriləcəyini bildirsə də, indi İranın enerji obyektlərinə hücumların 5 gün müddətinə təxirə salınmasına göstəriş verib.
Lakin rəsmi Tehran bu iddiaları təkzib edib. İran Xarici İşlər Nazirliyi açıqlamasında Vaşinqtonla “heç bir dialoqun olmadığını” bəyan edib. Mənbələr isə bildirir ki, son günlər bir sıra ölkələr tərəflər arasında gərginliyi azaltmaq üçün vasitəçilik etməyə çalışır.
Bu arada bölgədə hərbi əməliyyatlar davam edir. Məlumatlara görə, münaqişə başlayandan bəri İran və Livanda minlərlə insan həyatını itirib. İran mediası İsrailin son hücumlarında Tehranda bir neçə obyektin vurulduğunu bildirib.
Trampın açıqlamaları qlobal bazarlara da təsir edib. Brent crude markalı neftin qiyməti əvvəlcə bir barel üçün 114 dollara qədər yüksəlsə də, daha sonra 7%-dən çox ucuzlaşaraq 99 dollardan aşağı düşüb.
Analitiklər hesab edir ki, tərəflər arasında mümkün diplomatik irəliləyişlər enerji bazarlarında qeyri-müəyyənliyi azaltsa da, regionda vəziyyət hələ də gərgin olaraq qalır.
Mənbə: CNN